




“ВОЗЉУБИ ГО ГОСПОДА, СВОЈОТ БОГ, СО СЕТО СВОЕ СРЦЕ, И СО СЕТА СВОЈА ДУША, И СО СИОТ СВОЈ РАЗУМ; - ТОА Е ПРВАТА НАЈГОЛЕМА ЗАПОВЕД;
А ВТОРАТА Е СЛИЧНА НА НЕА: ВОЗЉУБИ ГО СВОЈОТ БЛИЖЕН КАКО СЕБЕ СИ!
НА ТИЕ ДВЕ ЗАПОВЕДИ СЕ КРЕПАТ ЦЕЛИОТ ЗАКОН И ПРОРОЦИТЕ“ (Матеја 22:37-40).
ДОБРОТОЉУБИЕ – TOM I
Преподобен Авва Исаиј
24. За безстрасноста
Слово на преподобниот авва Исаиј кон неговите ученици
24. За безстрасноста
1. По патот на добродетелите има паѓања, зашто има непријатели, има промени, има изобилство, има оскудност, има жалост, има радост, има страдање на срцето, има успеси, има принудувања, затоа што тоа е патување за да се постигне успокојување.
2. Безстрастието е далеку од сето тоа и нема потреба од ништо, зашто тоа е во Бога и Бог е во него. Тоа нема непријатели, нема паѓања, ни неверување, ни труд околу запазување, ни страв од страстите, ни копнеш по некаква работа, ниту вознемирување околу нешто демонско.
3. Големи и неизмерливо славни се неговите достоинства. Додека во некого има страв од некоја страст, сѐ дотогаш тој е далеку од безстрастието; сѐ додека од срцето на некого излегува осудување, сѐ дотогаш тој е далеку од безстрастието.
4. Тоа е телото што го примил нашиот Господ Исус Христос. Тоа е љубовта, која треба да ја пројавуваме во дела, а на која ги научил Тој, своите последователи.
5. Многумина неискусни помислиле, дека добиле безстрасност, додека страстите уште живееле во нивната душа, па и телото нивно уште не било исчистено од нив и се отклониле од доброто и неопходното. Простете ми, браќа заради Бога.
Преведе
Отец Митко Попоски
Виндзор, Канада